Actividades | 30 anos con Concha
O 10 de decembro de 2025 cúmprense 30 anos do pasamento de Concha Castroviejo Blanco-Cicerón, escritora, crítica literaria e xornalista de compostelá.
Baixo a idea de popularizar a súa figura, queremos facer realidade o título deste proxecto ‘30 anos con Concha Castroviejo’, transformando o esquecemento nunha merecida reivindicación.
Para iso, levamos a súa figura ás rúas da cidade mediante:
Paseo guiado
Percorrendo diferentes espazos da cidade relacionados coa autora, coñeceremos un pouco máis a súa figura.
Levaranse a cabo tres sesións guiadas os días:
- Mércores 10 de decembro ás 18.30 h.
- Venres 12 de decembro ás 18.30 h.
- Sábado 13 de decembro ás 12 h.
A actividade é de balde e conta con 30 prazas por sesión, previa inscrición en i.gal/Concha
Xogo de pistas
A modo de xincana damos a coñecer a vida de Concha Castroviejo dunha maneira amable e amena, á par que se percorre a zona vella, centrándonos nas sete portas da antiga muralla de Compostela nas que se basea o libro da escritora El jardín de las Siete Puertas.
Este xogo adaptouse a unha versión online para descubrir os diferentes aspectos da vida da nosa homenaxeada sen saír da casa.
Ambas versións están destinadas a todos os públicos mais están especialmente pensadas para a rapazada de entre 12 e 16 anos e o seu aproveitamento nos centros de ensino.
