O Concello de Santiago chama a romper co silencio na súa campaña polo Día Europeo contra a Trata de Seres Humanos
‘Toma nota: se calas, tamén tratas’ é o lema da campaña do Concello de Santiago con motivo do Día Europeo contra a Trata de Seres Humanos, que se conmemora cada 18 de outubro. Baixo a premisa de que a voz libera, o Goberno municipal chama a denunciar, apoiar e romper o silencio contra este delito que viola os dereitos humanos e atenta contra a dignidade, a integridade e a liberdade das persoas.
En Europa, a trata de seres humanos é un dos negocios ilícitos máis lucrativos, abastécese de mulleres, homes, nenas e nenos, que se converten en mercancía, obxectos explotados e comerciados.
O venres 17 de outubro representarase a obra 'Atrapadas' e o sábado 18 instalarase unha carpa informativa na praza do Toural
Carpa informativa e obra de teatro
Para tomar nota sobre esta problemática e explicar de que maneira podemos actuar contra ela, instalarase unha carpa informativa na praza do Toural o vindeiro sábado, 18 de outubro. Estará aberta de 11.00 a 18:00 horas e alí poderanse recoller diferentes materiais informativos.
O programa da campaña ‘Toma nota: se calas, tamén tratas’ inclúe tamén a representación da obra de teatro ‘Atrapadas’, de Maquinarias Teatro. Poderá verse o venres 17 de outubro ás 19.00 h na Sala Mozart do Auditorio de Galicia con entrada de balde ata completar capacidade. O espectáculo, dirixido e protagonizado por Eugenia Sanmartín e Helga Méndez, conta o periplo de varias mulleres sirias refuxiadas no porto do Pireo en Grecia. As dúas actrices poñen corpo e voz ás testemuñas reais destas mulleres que nos falan da súa fuxida da guerra, da fame, das violacións, as condicións sanitarias, a separación das súas familias…
Relación coa violencia de xénero
Das 10.793 vítimas de trata detectadas en Europa no 2023 (último ano con datos), o 63% eran mulleres ou nenas, mantendo unha tendencia constante.
En canto ao Estado Español, segundo datos do Ministerio do Interior, no 2024 rexistrouse un aumento do 22% das vítimas de trata con respecto ao ano anterior. No que se refire a vítimas de trata de explotación sexual, identificáronse 632 casos, sendo o 98% mulleres. Ademais, a trata por matrimonios forzados chegou á súa incidencia máis alta con 8 vítimas, todas mulleres, 6 delas menores de idade.
Estas cifras revelan a magnitude do fenómeno e a súa clara dimensión e relación coa violencia de xénero. A trata de seres humanos segue a ser unha realidade oculta, pero cada vez máis visible grazas á denuncia e á colaboración cidadá.
