No marco do Día Internacional das Mulleres, o Concello de Santiago pon en marcha “Tecer redes, escribir o futuro”; unha campaña que non se limita a unha acción conmemorativa, senón que se configura como un proceso participativo facendo do 8M un exercicio colectivo de memoria, creación e futuro compartido.

A expresión “tecer redes”  remite directamente á sororidade como práctica colectiva de apoio, coidado e resistencia fronte ás violencias machistas. Pola súa banda, “escribir o futuro” conecta coa figura de Begoña Caamaño (Vigo 1964 – Santiago de Compostela 2014), escritora, xornalista e activista feminista homenaxeada este ano no Día das Letras Galegas. Serve ademais para reivindicar a palabra e a cultura como ferramentas de transformación social.

Descarga aquí o cartel da campaña: CARTEL TECER REDES, ESCRIBIR O FUTURO

PROGRAMA

Reescribir o futuro: mitos e outras voces

Espazo participativo de creación e escritura colectiva inspirado na obra de Begoña Caamaño. Dirixen Ánxela Lema e Sara Villar.

Quendas:

• Martes 10, 17 e 24 de marzo en horario de 18:00 a 20:00 horas no Centro Sociocultural Maruxa e Coralia.
• Martes 7, 14 e 21 de abril de 17:30 a 19:30 no Centro sociocultural do Ensanche.

Prazo de inscrición: ata o 8 de marzo. Prazas limitadas.

INSCRÍBETE: formulario online

Encontros que pintan o futuro

Actividade que combina un espazo de diálogo colectivo arredor do feminismo, a sororidade e a creación comunitaria dinamizado, cunha intervención artística colaborativa que dará lugar a un mural colectivo.

Data de celebración do encontro: 12 de marzo de 18:00 a 20:00 horas na Casa Xohana Torres. Con María Rúa.

Mural colaborativo: a data para realización será notificada con suficiente antelación ás persoas participantes. O deseño base será realizado pola ilustradora e deseñadora Irene Sanjuán que posteriormente guiará a actividade.

Prazo de inscrición: ata o 8 de marzo.

INSCRÍBETE: formulario online.

Fiando sororidade

As persoas participantes poderán escribir en anacos de tea mensaxes, frases ou palabras vinculadas á igualdade, feminismo, ao apoio mutuo e á prevención das violencias machistas.

Cada fragmento recollido funcionará como un fío individual que, ao unirse co resto, conformará unha instalación colectiva final: unha rede xigante que será exposta no parque de Begoña Caamaño.

Datas:

• Do 5 ao 12 de marzo nos centros socioculturais de Conxo, As Fontiñas, Maruxa e Coralia e Laraño.
• Do 13 ao 19 de marzo nos centros socioculturais de Santa Marta, O Castiñeiriño, Vite e Lavacolla.