A programación prevista para este mes inclúe:

Teatro
Roteiro histórico
Faladoiro
Exposición participativa
Lectura do manifiesto: venres, 26 xuño
Gala do Orgullo: sábado, 27 xuño en Mazarelos.

Compostela segue dando pasos cara unha sociedade libre e diversa!

‘Rostros e Corpos contra o odio’ configúrase como un espazo artístico, participativo e comunitario arredor da diversidade, da memoria colectiva e da necesidade de construír redes sociais fronte aos discursos de odio e ás violencias LGTBIfóbicas. Poderá visitarse ata finais deste mes. 

Na súa intervención, Goretti Sanmartín fixo un chamamento a que todo o mundo participe nas actividades programadas para gozar do mes do orgullo en Compostela, que alén desta exposición inclúen teatro, un roteiro histórico, faladoiro, a lectura de manifesto e a Gala do Orgullo que se celebrará o sábado 27 en Mazarelos. Sanmartín Rei lamentou que estamos en tempos de involución, de mensaxes terribles de odio e acoso contra o colectivo LGBTIQ+. Diante desta realidade, reivindicou celebrar a dignidade e reclamar os dereitos de maneira festiva e considerou necesario “non só a resistencia, senón avanzar fronte a discriminación e a violencia”, tecendo redes, como di o lema da campaña. E neste sentido, afirmou que “aí temos que estar todo o mundo, tamén institucións, remando na mesma dirección”.

O concelleiro de Centros Socioculturais, Xan Duro, abriu o acto dando a benvida a esta mostra,  instalada no Centro Sociocultural do Ensanche, que acolle simultáneamente outra exposición do Consello da Cultura Galega ‘Pegadas para un tempo novo’, sobre a disidencia sexual en Galicia.

A exposición propón unha reflexión colectiva sobre os afectos, os corpos, os coidados, a identidade, a memoria e a ocupación positiva do espazo público. A mostra está formada por unha serie de pezas gráficas compostas mediante collage visual, fotografía e tipografía contemporánea, incorporando imaxes vinculadas á diversidade corporal, aos afectos, á cultura comunitaria, á memoria activista e á celebración do orgullo como ferramenta de resistencia e transformación social. As pezas combinan mensaxes de reivindicación, coidado e visibilidade, estruturándose arredor de diferentes eixos temáticos: Ningún paso atrás;  o orgullo tamén é coidado; o meu corpo non é un debate; o amor non fai dano, o odio, si;  ser eu é o meu orgullo; ou cultura que transforma, orgullo que une.

A proposta visual combina unha estética contemporánea e accesible, empregando elementos gráficos inspirados na idea de rede, conexión e comunidade como fío condutor da instalación. Ademais, a exposición incorpora un espazo aberto á participación da cidadanía mediante unha zona específica de creación colectiva que permitirá ampliar progresivamente a instalación ao longo dos días. Concretamente, este espazo participativo convida ás persoas asistentes a compartir mensaxes contra o odio, reflexións, palabras de apoio, desexos de futuro ou experiencias. As achegas poden realizarse mediante mensaxes suspendidas sobre cordas de cores  que acompañarán a exposición, podendo colocar as mensaxes, debuxos, collage etc empregando pinzas de cores e papeis de cores que se porán a disposición das persoas usuarias.

Deste xeito, o obxectivo é transformar a exposición nun espazo vivo de encontro e creación comunitaria, no que a cidadanía participe activamente na construción dun relato colectivo arredor da diversidade e dos dereitos humanos.

O Boletín Oficial da Provincia (BOP) da Coruña publica este mércores a  convocatoria de subvencións destinadas ao fomento de programas e actividades a favor da igualdade efectiva entre mulleres e homes, das persoas do colectivo lésbico, gay, bisexual, transexual, intersexual e queer (LGBTIQ+) e da prevención e loita contra as violencias machistas para o ano 2026 do Concello de Santiago.

A convocatoria está dotada con 30.000 euros e a subvención máxima por entidade establécese en 2.800 euros. Poden concorrer a estas axudas entidades sen ánimo de lucro inscritas no Rexistro municipal de asociacións e que desenvolvan as súas actividades principalmente en Compostela.

O prazo para presentar a solicitude é de 15 días naturais, contados a partir deste xoves, o día seguinte á publicación da convocatoria. 

As actividades subvencionables terán que ser realizadas entre o 1 de xaneiro e o 30 de setembro.

Establécense as seguintes liñas de actuación:

Liña 1. Programas e actividades de fomento da igualdade efectiva entre mulleres e homes. A súa finalidade é apoiar actividades e iniciativas que promovan a igualdade de xénero e a igualdade de oportunidades entre mulleres e homes.

Liña 2. Programas e actividades de fomento da igualdade efectiva das persoas LGBTIQ+. A súa finalidade é apoiar actividades e iniciativas que promovan a igualdade de trato, a non discriminación e a garantía dos dereitos das persoas do colectivo LGBTIQ+.

Liña 3. Programas e actividades para a prevención das violencias machistas no municipio de Santiago de Compostela. A súa finalidade é apoiar a posta en marcha e o desenvolvemento de actividades e iniciativas orientadas a avanzar cara a un municipio libre de violencias machistas.

A programación prevista para este mes inclúe as seguintes actividades

• Exposición participativa “Rostros e corpos contra o odio”: Instalación artística e comunitaria que se poderá visitar do 22 ao 28 de xuño no CSC do Ensanche, onde a cidadanía poderá participar compartindo mensaxes e reflexións. A entrada é libre.
• Roteiro histórico “Vida e historias LGBT da Compostela medieval e moderna”: Un percorrido guiado por Carlos Callón que terá lugar o 19 de xuño para visibilizar a memoria histórica e as realidades LGBT máis aló da idade contemporánea. Para esta actividade é preciso inscrición previa, a través do formulario ao que se pode acceder co QR do folleto informativo.
• Representación teatral “Travesía Unicornio”: Obra da compañía Teatro Ghazafelhos que será representada o15 de xuño no parque de Bonaval, dirixida ao público familiar para fomentar valores de respecto e diversidade.
• Faladoiro “Contra o odio: orgullo”: Espazo de análise e diálogo na Casa Xohana Torres o 25 de xuño con Xandre Garrido López sobre a situación actual da LGTBIfobia e o impacto dos discursos de odio. Entrada libre.
• Gala do Orgullo 2026: É o evento central da campaña e terá lugar na praza de Mazarelos o 27 de xuño. Contará con actuacións musicais (O Xoán, Pídechas o corpo), drag (Amanda Carallo) e a entrega de premios do certame de poesía de Avante LGBT+.
• Lectura do manifesto da Corporación Municipal LGBTIQ+. O 26 de xuño será a lectura do manifesto da corporación LGBTIQ+ que foi aprobada como declaración institucional no último pleno.